Jou huurders hou op om hul huur te betaal, maar weier hardnekkig om jou huureiendom te ontruim. As eienaar van die eiendom moet jy aanhou om die verbandpaaiemente, eiendomsbelasting, heffings, onderhoudswerk en munisipale dienste te betaal. Die versoeking is groot om self ‘n plan te wil maak met die huurders. Jy sal selfs hul elektrisiteit en water wil afsny en hulle uitkry om te keer dat hulle verder op jou onkostes en in jou eiendom woon. Hierna sal jy dan eerder aan ‘n beter, betalende huurder wil verhuur.

’n Onlangse beslissing van die hooggeregshof wys weereens hoekom dit gevaarlik is om die reg so in eie hande te neem. Ons eindig met 'n nota oor hoekom jou huurkontrak altyd skriftelik, duidelik en omvattend moet wees.

Om misbruik te maak van 'n werkgewer se beleid oor siekteverlof, mag vir sommige werknemers normaal wees, maar pasop – dit kan ‘n slegte nadraai hê.

Jou besigheid se winsgewendheid, selfs die voortbestaan daarvan, kan afhang van hoe effektief jy jou debiteure invorder. Wanneer 'n debiteur dus weier om op jou beleefde versoeke vir betaling te reageer, moet jy daaraan dink om verdere regstappe te neem.

Regsterm : "Fiktiewe vervulling" (“Fictional fulfilment”)

Jy sal hierdie term in kontraktuele dispute teëkom, waar een van die partye doelbewus probeer om die vervulling of nakoming van 'n opskortende voorwaarde te keer, in ‘n poging om van die bepalings van die transaksie te ontsnap. Met eiendomsverkope is dit dikwels die "verbandklousule" wat ter sprake is, waar die hele verkooptransaksie "opgeskort" word totdat die koper se verband toegestaan word. Die koper kry dalk koue voete en frustreer dan doelbewus die toestaan van 'n verband. In gepaste omstandighede kan 'n hof die voorwaarde as vervul verklaar, deur die historiese regsbeginsel van "fiktiewe vervulling van 'n opskortende voorwaarde" toe te pas.

Uit die HAT:

“miljard” s.nw. [die getal 1 000 000 000 of 10⁹] duisend miljoen. Daar is ‘n sterk neiging onder Afrikaanssprekendes om, onder invloed van veral Amerikaanse Engels, biljoen vir ‘n duisend miljoen te gebruik, eerder as miljard. Nietemin, die standaardgebruik in Afrikaans bly steeds miljard vir duisend miljoen en biljoen vir ‘n miljoen miljoen.   [Frans milliard]