|
Bewaar jou Titelakte!
Problems with lost, damaged, or destroyed title deeds cause huge delays and frustrations for everyone in the property industry. We give some background and tips.
Asof die sluit van die aktekantoor gedurende die pandemie nie genoeg frustrasie veroorsaak het nie, skep die uitdagings wat sedert die begin van die jaar ondervind word met aansoeke om verlore aktes nou verdere kopsere in die proses van aktes-registrasie.
Soos meeste van ons lesers weet, kan geen registrasie handeling by die aktekantoor inisieer word waar die oorspronklike titelakte, of verbandakte verlore- of vernietig is nie, tensy die geregistreerde houer daarvan, eers 'n gewaarmerkte afskrif van sodanige akte bekom het by wyse 'n formele aansoek daarvoor vanaf die betrokke aktekantoor.
Kragtens gewysigde wetgewing wat sedert Januarie vanjaar van toepassing geword het, moet elke aansoeker om 'n gewaarmerkte afskrif van ‘n registrasie dokument die publiek in kennis stel, by wyse van 'n advertensie in enige koerant wat versprei word binne die gebied waar die eiendom geleë is, van sodanige voorneme en hul (die publiek) ‘n geleentheid bied om 'n afskrif van betrokke registrasie-dokument te inspekteer en om ‘n geldige beswaar aan te teken teen die uitreiking van die vervangende afskrif binne ‘n 14 dae periode na die publikasie daarvan.
In die geval van 'n notariële verband, moet die advertensie egter in 'n koerant gepubliseer word wat versprei word in die omgewing van die aktekantoor waar sodanige verband geregistreer is.
Ondervinding oor die laaste paar maande het geleer dat hierdie verandering meegebring het dat aansoeke om vervangende registrasie dokument ongelukkig lang vertragings met registrasie meebring en ook die koste van die proses aansienlik verhoog.
Daar moet nie uit die oog verloor word dat in gevalle waar ‘n eiendom onder ‘n verband verbind is, die finansiële instelling as verbandhouer, boonop moet toestem tot die aansoek om uitreiking van ‘n vervangende kopie verlore of vernietigde akte. Hoewel verbandhouers in meeste gevalle die titel- en verbandaktes in veilige bewaring hou, gebeur dit ongelukkig ook dikwels dat hulle die registrasie dokumente verloor of misplaas en dit veroorsaak natuurlik verdere vertragings, veral weens die feit dat verbandhouers aandring dat hul genomineerde aktebesorgers die aansoek moet voorberei en indien.
Dit is dus noodsaaklik dat grondeienaars en eiendomsagente so gou as moontlik vasstel of die oorspronklike titelakte beskikbaar is, sodat die aktebesorger onmiddellik kan begin met die proses om die vervangende akte te kry indien dit verlore is.
Dit is natuurlik goeie praktyk om ‘n register te hou van al jou vaste bates tesame met ‘n nota oor waar die betrokke titelakte gebêre word.
Met die huidige ontwikkeling van sogenaamde “block-chain” kripto-tegnologie en die legio van moontlikhede wat dit bied, kan mens net hoop dat papier titelaktes in die toekoms vervang sal word met onvernietigbare digitale eiendomsbewyse. Hiermee blyk Nigerië ons reeds een voor te wees. ( volg gerus die skakel: https://medium.com/@TCCPm/the-next-big-thing-in-cardano-land-registration-reform-b43340a700b5)
‘n Geseënde Kersfees en beste wense vir 2021.
Hennie, Eberhard, Cheryl-Anne en die hele VZK-span.
|
|
|
