Om jou van te verander – Jou keuses by huweliksluiting, egskeiding en afsterwe van ‘n lewensmaat
"What's in a name? That which we call a roseBy any other name would smell as sweet" (William Shakespeare)
Jy mag nie enige ander van in Suid-Afrika gebruik as die van wat in die Nasionale Bevolkingsregister vir jou verskyn nie. As jy dit nie volg nie, kan dit vir jou probleme op die hals haal. Wees dus omsigtig met enige gebeurtenis wat aanleiding kan gee tot ‘n moontlike naamsverandering.
Dit is nie die tipe besluit wat jy daar en dan voor die kansel wil maak nie!
As ‘n vrou wat in die huwelik tree, moet jy besluit watter van jy na huweliksluiting voortaan in jou handel en wandel gaan gebruik.
Daar is natuurlik voor- en nadele om met die verskillende opsies te oorweeg, maar regtens is dit uiteindelik jou keuse om te maak.
Dink voor die tyd daaroor en besluit dan wat jy wil doen. Jy wil nie hierdie keuse voor die kansel maak nie. Die keuse wat jy gaan maak, word na afloop van die huweliksluiting, in die huweliksregister opgeneem. Jy moet aandui watter van jy as vrou na afloop van die huwelik gaan gebruik. Die Departement van Binnelandse Sake sal hierdie keuse soos aangedui in die huweliksregister in die Bevolkingsregister opneem.
Hierdie is die keuses wat tot jou beskikking is na huweliksluiting, egskeiding en na afsterwe van jou lewensmaat.
-
Neem jou man se van aan of behou jou man se van.
-
Gebruik jou nooiensvan of keer terug na die gebruik van jou nooiensvan of enige ander van wat jy voorheen regtens gehad het.
- Jy kan ook die twee vanne saamvoeg en voortaan ‘n dubbele van gebruik.
Moet jy aansoek doen om jou van te verander? Wat is die situasie met mans?
As ‘n vrou hoef jy nie aansoek te doen om hierdie veranderinge te maak nie. As jy dit egter in die bevolkingsregister reg wil laat opneem, moet jy skriftelik vir die Departement van Binnelandse Sake in kennis stel, anders sal daar geen aanpassing in die bevolkingsregister opgeneem word nie.
Vir enige ander verandering in jou naam of jou van, moet jy eers by Binnelandse Sake aansoek doen vir magtiging. Jy sal goeie en voldoende redes moet verskaf vir die beoogde naamsverandering en jy sal dit ook in die Staatskoerant moet laat publiseer, voordat goedkeuring verleen sal word.
Nota: Die verwysing na “‘n vrou” as dit kom by “die Aanneming van ‘n Ander Van” in die Wet op die Registrasie van Geboortes en Sterftes kan sekerlik op grondwetlike redes onder oorweging kom. Vir nou beteken dit dat die situasie so bly en dat mans aansoek moet doen as hulle hul naam wil verander of selfs ‘n saamgevoegde van saam met hul vrouens wil laat registreer.
Wat gebeur as jy eiendom koop en verkoop?
Indien jy met eiendom gaan handel, dit koop of verkoop, sal die oordragprokureur weet hoe om die partye se korrekte name in die transaksie te reflekteer. As ‘n reël sal die oordragprokureur vereis dat die partye hul name en hul naamkeuses ook onder eed moet bevestig en rekord hou van hierdie aangeduide keuses.
Provided by Van Zyl Kruger
© DotNews. All Rights Reserved.